நான் எல்லாத்துக்கும் ரெடி!: சிம்ஹா பேட்டி

ரசிகர்கள் அவரது நடிப்பைக் கொண்டாடுகிறார்கள். அவரோ “இந்த வெற்றிக்கான காரணம் நானல்ல, இயக்குநர்தான்” என்று அடக்கத்துடன் கூறுகிறார்.

‘பீட்சா’, ‘நேரம்’, ‘சூது கவ்வும்’, ‘ஜிகர்தண்டா’ என பாபி சிம்ஹாவுக்கு அமைந்த படங்கள் எல்லாமே ஒவ்வொரு வகையில் அவரது நடிப்புத் திறனுக்குப் பெருமை சேர்த்திருக்கின்றன. ‘ஜிகர்தண்டா’ இவருக்குத் திருப்புமுனையாக அமைந்துவிட்டது. ‘ஜிகர்தண்டா’ வெற்றியைப் பருகிக்கொண்டிருந்தவரிடம் பேசியதிலிருந்து...

‘ஜிகர்தண்டா’வில் உங்களது நடிப்பிற்கு வாழ்த்துகள் குவியுதே…

எல்லாவற்றுக்கும் காரணம் கார்த்திக் சுப்புராஜ்தான். சேது அப்படிங்கிற பாத்திரத்தை எனக்காக வடிவமைத்தான். இப்படித்தான் பேசணும், இப்படிப் பாரு, இப்படி நட என்று எல்லாம் பார்த்துப் பார்த்துப் பண்ணினான். இப்போ எல்லாரும் சிம்ஹா அசத்திட்டான்னு சொல்றாங்க. சந்தோஷமா இருக்கேன். ‘ஜிகர்தண்டா’ படத்தில் இடைவேளைக்குப் பிறகு ஒரு திரையரங்குக்குள் கண்ணீரோடு நடந்து போவேன். அது மாதிரி இப்போ நிஜத்தில் ஒவ்வொரு திரையரங்குக்கும் போயிட்டு இருக்கேன்.

‘ஜிகர்தண்டா’ அனுபவம் பற்றிச் சொல்லுங்க?

நான் ரொம்ப கஷ்டப்பட்டு, இஷ்டப்பட்டு பண்ணிய படம் ‘ஜிகர்தண்டா’. இனி சேதுவை முறியடிக்கிற மாதிரி ஒரு பாத்திரம் கிடைக்குமான்னு தெரியல. ‘ஜிகர்தண்டா’தான் கார்த்திக் சுப்புராஜ் எழுதிய முதல் கதை. எனக்கு நாலு வருஷத்திற்கு முன்னால் இந்தப் படத்தின் கதை தெரியும். நான் அப்பவே கார்த்திக் கிட்ட, ‘நான் சேது ரோல் பண்ணட்டுமா?’ன்னு கேட்டேன். ‘வேண்டாம்… சரிப்பட்டு வராது. வேறொரு வேஷம் கண்டிப்பா தாரேன்'னு சொன்னான்.

போன வருஷம் வந்து, “நீ தான்டா சேது” என்றான். அப்போ நாம நினைச்ச ரோல் கிடைச்சுடுச்சு. நம்மகிட்ட இருக்கிற எல்லாத்தையும் ஒரே படத்துல கொட்டிரணும்னு அவ்வளவு உழைச்சேன். என்னை முழுக்க சேதுவாக மாத்தினான் கார்த்திக். அவனுக்கு என்னோட நன்றியை எப்படிச் சொல்லப் போறேன்னு தெரியல.

இந்தப் படம் தோத்துச்சுன்னா என் வாழ்க்கை போச்சு. ஆனா ஒரு நடிகனா உனக்குப் பெரிய எதிர்காலம் இருக்குடான்னு கார்த்திக் சொன்ன வார்த்தை இப்பவும் ஞாபகத்தில் இருக்கு. எப்படிடான்னு கேட்டேன். அதற்கு ‘உன்னை நான் நம்புறேன்டா. அவ்வளவுதான். நீ பண்ணுவ’ன்னு சொன்னான். எல்லாருடைய பாராட்டையும் வாங்கிட்டு நான் நிற்கிறேன். அதை என் பக்கத்தில் இருந்து ரசிக்கிறான். ஒரு சிலையைச் செதுக்கிக் கோயில்ல வைச்சுட்டு, செதுக்கியவர் அடுத்த சிலையைச் செதுக்கப் போயிருவார். என்னைச் செதுக்கி அழகு பார்த்தவன் கார்த்திக் சுப்புராஜ்.

ட்விட்டரில் நீங்கதான் ‘ஜிகர்தண்டா’வின் ரியல் ஹீரோ என்று கூறுகிறாரே சித்தார்த்?

நான் இரண்டாவது நன்றி கூறுவது சித்தார்த்துக்கு. ஏன்னா, உடன் நடிக்கும் ஒரு நடிகருக்கு இவ்வளவு பெரிய இடத்தைக் கொடுக்க ஒரு முன்னணி நடிகருக்கு எப்படி மனசு வரும்? அந்த மனசு சித்தார்த்திடம் இருக்கிறது. ‘ரங் தே பசந்தி’ படத்தில் அவரோட நடிப்புக்கு நான் ரசிகன். இப்போ அவருடன் நடித்தது மிகப் பெரிய அதிர்ஷ்டம். அவருக்கு ஷாட் இல்லன்னாகூட வந்து நான் நடிக்கிறதைப் பார்ப்பார். இதை ஏன் இப்படிப் பண்றே… இப்படிப் பண்ணு கிளாப்ஸ் அள்ளும்னு சொல்வார். என்னை மாதிரி நடிகர்கள் எல்லாம் சித்தார்த் கூட ஒரு படமாவது நடிச்சிரணும்.

சினிமாவுக்கு வரும்போது உங்க வீட்டுல என்ன சொன்னாங்க?

எங்க வீட்டுல முதல்ல தெரியாது. முதல்லயே பக்காவா ப்ளான் பண்ணித்தான் சென்னைக்கு வந்தேன். சென்னை போய் வேலை பார்க்கப் போறேன்னு சொல்லிட்டு வந்துட்டேன். இல்ல டிகிரி முடிச்சிட்டு உன்னோட வாழ்க்கையை நீ பாத்துக்கோன்னு சொல்லிட்டாங்க. பிசிஏ படிச்சிட்டு சென்னை வந்து வேலை கிடைச்சிடுச்சுனு பொய் சொல்லிட்டே இருந்தேன். நாலு வருஷம் கழிச்சுதான் அவங்களுக்கு நாளைய இயக்குநர் மூலமா தெரிஞ்சிது. டிவில நான் நடிச்ச குறும்படங்கள் எல்லாம் பாத்துத்தான் தெரிஞ்சிது. இதுவரைக்கும் நான் என்ன பண்றேன் அப்படிங்கிற எந்த ஒரு விஷயமும் வீட்டுக்கு முழுசா தெரியாது. நடிப்புல ஆசையா ஏதோ பண்ணிட்டு இருக்கான்னு மட்டும் தெரியும்.

ஒரு முறை வீட்டுக்குப் போனப்போ, எங்கப்பா ‘நேரம்னு ஒரு படம் நடிச்சியாமே, நல்லா நடிச்சியாம்... நிறைய பேரு சொன்னாங்க. சி.டி இருந்தா கொடு'ன்னு கேட்டார். ‘இதே மாதிரி சின்னச் சின்ன கேரக்டர் பண்ணி வாழ்க்கைல முன்னேறு, ஹீரோ எல்லாம் பண்ணாதே. மாட்டிக்குவ'ன்னு சொன்னார். உடனே எங்கம்மா ‘ஏன் பண்ணக் கூடாது. என் பையன் ஹீரோவாவும் பண்ணுவான்”னு சொன்னாங்க.

‘ஜிகர்தண்டா’ பாத்துட்டு அப்பா என்ன சொன்னார்?

எங்கப்பா போய்ப் படம் பார்த்துட்டு என்னோட நண்பன் கிட்ட, ‘அவன் சென்னைக்குப் போய் உருப்படாமல் போகப் போறான்னு நினைச்சுட்டு இருந்தேன். அவனோட வாழ்க்கையை நினைச்சு எனக்கு ஒரு பயம் இருந்துச்சு. இப்போ ‘ஜிகர்தண்டா' பார்த்த உடனே எனக்கு அந்தப் பயம் போயிடுச்சு. ரொம்ப சந்தோஷமா இருக்கேன்'ன்னு சொல்லிருக்கார். எங்கப்பா இப்படிப் பேசி நான் பார்த்ததேயில்லை. இதை என் நண்பன் போனில் சொன்னப்போ என்னை அறியாமல் கண் கலங்கிட்டேன். அவரோட வார்த்தையைக் கண்டிப்பா நான் காப்பாத்துவேன்.

இனிமேல் நீங்க காமெடியனா, ஹீரோவா, வில்லனா?

பசியோட வர்றவனுக்குச் சாப்பாடு போட்டா வயிறு ஃபுல்லா சாப்பிடணும்னு தோணும். அதே மாதிரிதான் எனக்கு நடிப்பும். ஒவ்வொரு படம் நடிக்கும்போதும், எனக்கு முழு திருப்தியா இருக்கணும்னு தோணும். என்னைப் பொறுத்த வரைகதைதான் ஹீரோ. அந்தக் கதைக்கு என்ன தேவையோ அது காமெடியா, ஹீரோவா, வில்லனா எதுவானாலும் இந்த சிம்ஹா தயாரா இருப்பான்.

தி இந்து:ஞாயிறு, ஆகஸ்ட் 10, 2014

கொஞ்சம் சினிமா ... கொஞ்சம் பாப்கார்ன் - ஜிகர்தண்டா

தி இந்து:திங்கள், ஆகஸ்ட் 4, 2014

முதல் காட்சியில் ‘மலர்ந்தும் மலராத பாதி மலர்போல’ பாட்டின் பின்னணியில் டுமீல் வெடிக்கும்போதே பசங்க என்னமோ செய்யப்போறாங்க என்பது தெரிந்துவிடுகிறது.

ஊரே நடுங்கும் அதிபயங்கர ரவுடிக்கு நடிப்புக் கலை மீது திடீர் ஆசை வருவதால் விளையும் ரகளைதான் ‘ஜிகர்தண்டா’.கார்த்திக்குக்கு (சித்தார்த்) சினிமா இயக்குநராக வேண்டும் என்பது கனவு. ரத்தம் தெறிக்கும் க்ரைம்கதையை எடுக்க ஒரு வாய்ப்பு கிடைக்கிறது. மதுரையில் உள்ள அதிபயங்கர ரவுடியான ‘அசால்ட்’ சேதுவின் (பாபி சின்ஹா) வாழ்க்கையைப் படமாக்க வேண்டுமென்று நினைக்கிறான்.

அவன் வாழ்க்கையை ஆழமாகவும் விவரமாகவும் தெரிந்துகொண்டு படமாக்க விரும்புகிறான். மதுரையில் தன் நண்பன் ஊரணியின் (கருணாகரன்) உதவியுடன் வேலையைத் தொடங்குகிறான்.

பல்வேறு முயற்சிகளுக்குப் பின் வெற்றி கிடைக்கும் நேரத்தில் சேதுவிடம் மாட்டிக்கொள்கிறான் கார்த்திக். அதிலிருந்து எப்படித் தப்பிக்கிறான், அவனுடைய சினிமா கனவு என்ன ஆயிற்று என்பதைப் பல திருப்பங்களுடன் சிரிக்கச் சிரிக்கச் சொல்லியிருக்கிறார் இயக்குநர்.

ஒவ்வொரு இயக்குநருக்கும் இரண்டாவது படம் அக்கினிப் பரீட்சை என்பார்கள். அந்தப் பரீட்சையில் வெற்றிகரமாகத் தேறியிருக்கிறார் ‘பீட்சா’வின் மூலம் கவனம் ஈர்த்த கார்த்திக் சுப்பராஜ்.

படம் எடுக்க வேண்டும் என்று தவிக்கும் இளைஞனின் கதையாகத் தொடங்கி, படமாக எடுக்கப்படும் ரவுடியின் கதையாக விரிந்து, படம் எடுக்கப்பட்ட கதையே முக்கியக் கதையாக மாறுவதுதான் திரைக்கதையின் ஆச்சரியம். மையப் பாத்திரம் என்ற ஒன்று இல்லாமல் நிகழ்வுகளை வைத்தே கதையை நகர்த்திக்கொண்டு போன அணுகுமுறையின் மூலம் வித்தியாசப்படுகிறார் கார்த்திக் சுப்பராஜ். தமிழ் சினிமாவின் ஆகிவந்த படிமங்களை அனாயாசமாக உடைத்திருக்கிறார். எல்லாப் பாத்திரங்களும் ஏதோ ஒரு விதத்தில் பகடி செய்யப்படுகின்றன. யாருக்கும் எந்தப் பீடமும் இல்லை.

படத்தின் முக்கியமான சரடு நம் கலாச்சாரத்தின் ஒரு பகுதியாகவே ஆகிவிட்ட சினிமா மோகத்தின் மீதான பகடி. ரவுடியில் தொடங்கி சாவு வீட்டில் ஒப்பாரியில் இருக்கும் பெண் வரை சினிமா, சினிமாக்காரர்கள் என்றதும் வாயைப் பிளப்பதை இயக்குநர் ‘அசால்டாக’ காட்டியிருக்கிறார்.

சில காட்சிகளை மிக நுட்பமாகக் கையாண்டிருக்கிறார். உதாரணம் கழிப்பறையில் நடக்கும் கொலை. துரோக கூட்டணியை மடக்கும் காட்சி இன்னொரு உதாரணம்.

சின்னப் பாத்திரங்கள்கூட மனதில் ஒட்டிக்கொள்கின்றன. பெட்டிக்கடை தாத்தா, நாயகனின் அம்மா, கொல்லப்பட்டவனின் மனைவி, குழந்தை... இவ்வளவு கவனம் எடுத்துக்கொண்டிருக்கும் மனிதர், கதாநாயகியையும் அவளுடைய காதலையும் இவ்வளவு மேலோட்டமாகவா கையாண்டிருக்க வேண்டும்? புடவை திருடும் கதாநாயகி தமிழுக்குப் புதுசு. ஆனால், அதைத் தாண்டி லட்சுமி மேனனுக்குப் பாவம், படத்தில் வேலையே இல்லை.

பாபி சின்ஹாவின் அபார நடிப்புக்கு சபாஷ் சொல்லியே ஆக வேண்டும். அலட்டிக்கொள்ளாத ரவுடி, பின்னாளில் உருமாறும் விதத்தைக் கச்சிதமாகவும் நுட்பமாகவும் சித்தரித்திருக்கிறார். கொடுத்த வேலையை நேர்த்தியாகச் செய்திருக்கிறார் சித்தார்த்.

நடிப்பு வாத்தியாராக வரும் சோமசுந்தரத்தின் நடிப்புக்கும் அவர் சம்பந்தப்பட்ட காட்சிகளுக்கும் அரங்கில் அடேங்கப்பா ஆரவாரம். ரசிகர்கள் கொண்டாடுகிறார்கள். நண்பனாக வரும் கருணாகரன், சேதுவின் கையாளாக வரும் ராமகிருஷ்ணன் ஆகியோர் தங்கள் நடிப்பால் படத்துக்கு மதிப்பைக் கூட்டுகிறார்கள்.

சேதுவின் நடவடிக்கைகளைக் கண்காணிக்கும் வியூகங்கள் அவ்வளவாக ஈர்க்கவில்லை. நண்பர்கள் இருவரும் எடுக்கும் ரிஸ்க் நம்பும்படி இல்லை. இரண்டாம் பாதியின் நீளத்தைக் குறைத்திருக்கலாம்.

குற்றப் பின்னணியும் நகைச்சுவையும் கலந்த திரைக்கதைக்குப் பொருத்தமான பின்னணி இசையைத் தந்திருக்கிறார் சந்தோஷ் நாராயணன். ‘கண்ணம்மா கண்ணம்மா’ பாடல் ரசிக்க வைக்கிறது. கிணற்றுக்குள் படமாக்கப்பட்டிருக்கும் ‘பாண்டிய நாட்டுக் கொடி’ குத்துப் பாட்டு ரசிகர்களை ஆட்டம்போட வைக்கிறது.

‘என்கவுன்டர்’ காட்சியிலிருந்து சேது எழுந்திருக்கும்போதே படம் முடிந்துவிடுகிறது. அதற்கு அப்புறமும் காட்சிகள் வேண்டுமா என்ன?